Árshátíð Landeigendafélags Hests 2015 verður haldin með hefðbundnum hætti um Verslunarmannahelgina og fer fram á félagssvæðinu í Kinnhesti laugardaginn 1. ágúst. Að venju hefst árshátíðin kl. 13:00 á Brandarakeppni barna og að henni lokinni fer fram Hestlandsmeistaramót í Kubb. Léttar veitingar (pylsur og gos) verða í boði félagsins að Brandarakeppninni lokinni. Um kl. 22 um kvöldið verður varðeldur í Kinnhesti með brekkusöng.
Skráning í Kubbmótið og Brandarakeppni barna fer fram á staðnum. Keppt er um veglega farandgripi. Að vanda keppa 3ja manna lið í Kubbmótinu. Einnig er veitt viðurkenning fyrir besta liðsbúninginn. Kennsla fyrir byrjendur í Kubbi fer fram í Kinnhesti keppnisdaginn kl. 11:00.


Upplýsingar um reglur Brandarakeppninnar og Hestlandsmeistaramótsins í Kubbi má sjá á heimasíðu félagsins undir ”Félagsstörf”.

Góða skemmtun!

f.h. árshátíðarnefndar,

Halldór í Kerlingagarði

Ágætu lóðahafar í Hesti og Kiðjabergi.

Nú er komið að því að hitaveitan sem við höfum stefnt að verði að veruleika.  Síðastliðinn föstudag, 24. apríl, sendi Grímsnes- og Grafningshreppur bréf til þeirra sem höfðu sótt um hitaveitu með lykilupplýsingum varðandi málið.

Næsta þriðjudag, 28. apríl, mun greiðsluseðill koma í heimabanka þess sem sótti um, með gjalddaga 5. maí og eindaga 15. maí.

Framkvæmdin mun svo hefjast fyrri hluta sumars 2015 og ljúka haustið 2016.

Við höfum öll miklar væntingar um að verkið gangi greiðlega fyrir sig svo við hvetjum okkur öll til þess að greiða stofngjaldið sem fyrst fyrir eindaga.  Enn er möguleiki fyrir þá sem ekki hafa sent inn umsókn að slást í hópinn og er þeim bent á að óska eftir umsóknareyðublaði frá hitaveitu Grímsnes- og Grafningshrepps.

Rétt er að geta þess að verið er að vinna í því að fá ljósleiðara á svæðið og er frétta að vænta á næstu vikum.

Kær kveðja,
Ólafur Kristinsson
Jens Helgason

Ágætu sveitungar í Hesti.

Gleðilegt sumar og takk fyrir veturinn.  Með hækkandi sól og vorkomunni kemur árlegur vinnudagur Hestlendinga sem að þessu sinni verður laugardaginn 16. maí n.k.

Mæting verður í Kinnhesti kl 13:00 og við hjálpumst að við ýmis sameiginleg vorverk.

Þar er helst að nefna hefðbundin störf svo sem girðingarvinnu, viðgerð á Orminum langa og annað sem til fellur.  Vinnudeginum lýkur svo með kaffi og meðlæti eins og hefð er fyrir.

Að venju er gert ráð fyrir að við mætum með skóflu eða garðhrífu sem kæmu að notum.

Varðandi kalda vatnið er verið að þrýsta á að rafvirki, pípari og Rarik ljúki sínum þætti í verkefninu við að koma 3 fasa rafmagni að dælunni og koma nýrri dælu fyrir.

Upplýsingar verða sendar um leið og þær liggja fyrir.

Kær kveðja
Ólafur Kristinsson

Föstudaginn langa verður hin árlega píslarganga á Hestfjall.


Mæting kl. 13:00 í Kinnhesti.

Sameinast verður í bíla og ekið á upphafsreit göngunnar. Göngutími er áætlaður um 3 tímar. Mætið vel búin og í góðum gönguskóm. Gott er að hafa með sér stafi.

Ath. Gengið verður um Snæfoksstaðaskóg ef veður og færð leyfa ekki göngu á fjallið.

Sjáumst heil í Kinnhesti á föstudaginn langa kl. 13:00.

Halldór í Kerlingagarði