Þorravísur 1999

Þorrablót Landeigendafélagsins var haldið í Golfskálanum á Kiðjabergi laugardaginn 16. janúar.  Þrátt fyrir vont veður vegna einnar dýptstu lægðar aldarinnar var vel mætt eða 44 þátttakendur.  Á þorrablótinu mæltu fulltrúar allra sumarbústaða fram vísu um bæ sinn.  Þær fara hér á eftir í þeirri röð sem þær voru fluttar:

1.   Æsa                              2.  Heiðarsel                         3.   Ásgarður 
4.   Klettasel                       5.  Merki                              6.   Brekkukot 
7.   Kerlingagarður              8.  Sunnuhlíð                         9.   Bær 
10.  Hlíð                             11.  Hlíðarendi                      12. Sjónarhóll/Bláhiminn 
13.  Hamrahlíð                   14.  Gaularás                        15.  Fagrahlíð

 

Æsa

   Sæluvísa til Ásu í Æsu 
(lag: Nú birtist mér í draumi) 
ort í orðstað Gylfa Thorlacius

Nú virtist mér í Draumi sem dýrlegt ævintýr 
hver dagur sem í návist Ásu eyddi 
með Þorramat í Sælu ég sveif um eins og nýr 
og svakalega danski bjórinn freyddi.

Hrútspunga og harðfisk ég hlakka til að fá 
það holt er fyrir hjartaæðar mínar 
og lundabagga og lifrarpylsu langar mest sð sjá 
og lystaukandi flatkökurnar þínar.

Þótt Suðurlandsskjálfti skelfi ég skeyti því ei par 
og skelli mér í jeppabifreið mína 
til Æsu ek ég spenntur því Ása bíður þar 
með Álaborgarákavítið fína. 
 

Heiðarsel

Á sumum stöðum þykir best 
sem oftast vil ég vera 
í Heiðarseli í landi Hests. 
Helst vil ég beinin bera 
 

Ásgarður

Andagift mér í brjóstið blási 
Bögubósa ferskeytlu. 
Svo ég með skáldskapar lágu ljósi 
lýst geti lóð númer tuttugu.

Liggur austan í ási einum 
unaðsleg er þar morgunsól 
prýdd brekku og móa með stórum steinum 
slíkt sé landslagsarkitekstins jól.

Landamærin ei sér leyna 
liðast skurðir á vegu þrjá 
girðing ryðguð er að reyna 
rogast efst í brekku hjá.

Húsið skal í sumar rísa 
sómasmíði Völundar 
frændagarð og gesti hýsa 
gnótt af vistum verður þar.

Þar ég dvel til ævinnar enda 
ávallt hverskyns munaður 
að njóta lífsins lystisemda. 
Landið heitir Ásgarður. 
 

Klettasel

Í Hesttúni efst er hvað fegurst hér í sveit 
þar hömrum tignum undir, Klettasel leit. 
Hér flestir þykja eiga fallegastan reit 
það fyrirgef ég, fólkið betur ekki veit. 
 

Merki

Ég fletti tréð berki 
byrja að saga 
þannig rís Merki 
um ókomna daga.

Elsku besti stóri og sterki 
stattu með mér í vor. 
Ég þarf að byggja Merki 
en hef ekki kjark og þor.

Í landi sái ég plöntum og blómum 
og planta svo furu og lerki. 
Hífi svo hús með krönum og bómum 
og það á að heita Merki.

Ég ætla að sýna í verki 
og gera það sem er skást 
því húsið mitt Merki 
mun víða að sjást. 
 

Brekkukot

Undir bláhimni blíðsumars nætur 
byggt var Brekkukot hallanum í. 
Þar er haugur einn helvíti sætur. 
Hann verður farinn er vorar á ný.

Kennt er við kot eitt hálf byggt hús. 
Hvílir sem bátur í nausti. 
Byggði sér hreiður bústin mús 
í Brekkukoti á liðnu hausti.

Við hauginn stendur hús eitt ljótt, 
en húsbændurnir betri. 
Brekkutkot mun byggjast fljótt. 
Búið að liðnum vetri. 
 

Kerlingagarður

Karlinn skalf og byrgði skjá, 
snjórinn húsið barði, 
kúrði sínum konum hjá 
Kerlinga- í garði.

Karl í garði Kerlinga, 
kýldur er um maga. 
Velgir graut og vellinga 
vetrarlanga daga. 
 

Sunnuhlíð

Í sumarhúsi er sælt að dvelja 
ef sólin skín, þar undurblíð. 
Því er ei vandi, um að velja 
við viljum vera í Sunnuhlíð. 
 

Bær

Þar stendur Bær með bursti eina. 
Þar stendur Bær við árbakkann. 
En því er alls ekki hægt að leyna, 
að ölið gerir mann hálfskakkann! 
 

Hlíð

Hæstánægður er í Hlíð 
hennar skjólið þrái. 
Óska að hún alla tíð 
okkur saman nái. 
 

Hlíðarendi

Ást á Tedda ung ég festi 
og eiginmann hlaut. 
Okkar er Hlíðarendi á Hesti 
hamingjulaut. 
 

Sjónarhóll/Bláhiminn

Sólin vermir Sjónarhól. 
Sæblá þökin skína. 
Hér hafa saman byggt sér ból. 
Bragi, Rut og Lína.

Þar til birtu bregða fer 
og blundar fugl í stáum, 
ætla þau að una sér 
Undir himni bláum. 
 

Hamrahlíð

Er beygt var af braut til Biskupstungna 
drulla og holur tóku við. 
Bílnum með herkjum tókst að stjórna 
en léttist lundin er Hamrahlíð blasti við.

Samhent hjón úrAratúni 
una glöð í Hamrahlíð 
en Villa vill að allir viti 
að nafn á bæ er beggja smíð. 
 

Gaularás

Á Gaularási er heyskapur gleði og glaumur, 
geltandi hundur og marglitur bútasaumur. 
Þangað er öllum kjörið að kíkja 
og klárt mál: nokkra snapsa að sníkja.

Á Gaulaási grasið vex 
geltir tík og saumar víf 
bútateppi sem segja sex 
stjórnar enginn nema Liv. 
 

Fagrahlíð

Fagrahlíð er fegurst hlíða 
hampa mínu verð ég að 
og sárt mig mundi eflaust svíða 
ef enginn tæki undir það.

Hún inni jafnt sem úti skartar 
skrauti, skepnum, gróðrinum 
en gróflega þó einhver kvartar 
er kemur að blessuðum hundinum. 
Hann laumaðist yfir á aðra lóð 
lét sem hann skildi ekki hundabann 
lyng og mosa þar fótum tróð 
og truflaði bara nágrannann.

Við forláts biðjum og vonum að 
við gerum ei fleiri mistökin. 
Skálum svo bara uppá það 
og sláum þessu öllu uppí grín.